‘Penzi’ la Ben Pol sasa latia nanga kwa Ebitoke

MSANII wa Bongo Fleva Ben Pol ametia nanga rasmi kwa komediani wa kike nchini Anastazia Exavery maarufu Ebitoke mwenye umri wa miaka 19 ambapo amemwagia sifa kidede kuwa anastahili kuwa naye na mengi yatatokea.
Kitendo cha Ben Pol kutia nanga kwa Ebitoke ni kama vile kunakamilisha ndoto ya binti huyo ambaye aliyeshindwa kuficha hisia zake na kuamua kutumia mitandao ya kijamii kuelezea namna  anavyotamani Ben awe mumewe wa ndoa.
Wakati anatoa kilichopo moyoni kwake Ebitoke aliamua kumwaga chozi na hatimaye chozi lake Ben Pol ameliona na huenda akalifuta moja kwa moja.
Juzi usiku wakati wa kusherehekea miaka 15 ya muziki tangu msanii mahir Saida Karoli aanze kuimba, Ben Pol ametumia nafasi hiyo kuthibitisha sasa yupo na Ebitoke kwa kuamua kwenda naye wakiwa wameshikana mikono huku wakitendea kwa madaha.Hata alipoulizwa Ben anasema kuna mengi yatatokea kati yake yeye na Ebitoke kwani anazo sifa zote muhimu.