Diamond, Ali Kiba wakutanishwa kamati Serengeti Boys

 Diamond Platnumz

WANA USHAWISHI! Ndivyo unavyoweza kusema baada ya Mastaa wawili walioliteka soko la muziki wa Bongo fleva, Diamond Platnumz na Ali Kiba kutajwa katika listi ya wajumbe 10 wa kusaidia maandalizi ya timu ya vijana Serengeti Boys.

Mastaa hao walitajwa na Waziri wa Habari, Sanaa, Utamaduni na Michezo, Nape Nnauye ambapo wanaungana na wajumbe wengine nane kukamilisha listi hiyo ambayo kazi yao itakuwa kuhamasisha watanzania washiriki kwenye maandalizi ya timu hiyo ili iweze kufanya vizuri kwenye fainali za vijana zitakazofanyika Machi 24, mwaka huu nchini Gabon.

“ Lengo la kamati hii ni kuhakikisha timu yetu inafanya maandalizi makubwa ili tuweze kufanya maajabu nchini Gabon, na tayari Rais wa TFF yupo nchini Morocco kuweka masuala ya kambi sawa,” Alisema Waziri Nape.

Wajumbe wengine wanaounda kamati hiyo ni pamoja na Mtangazaji mkongwe, Charles Hillary, Katibu Mkuu wa TFF, Mwesigwa Selestine, Beatrice Singano, Ruge Mutahaba, Maulid Kitenge, Eric Shigongo, Hassan Abbas na mrembo Hoyce Temu.

 

Ali Kiba