Angelina Jolie kaamua kula bata na wanae bila Pitt

KIMWANA asiyezeeka kutoka ulimwengu wa filamu nchini Marekani, Angelina Jolie ameuanza mwaka akiwa na watoto wake watatu katika mtoko wa pamoja ikiwa ni kitambo kirefu kupita tangu kuachana na baba watoto wake, Brad Pitt.

Mshindi huyo wa tuzo za Oscar alitoka na watoto wake Zahara, Vivviene na Knox kwenda katika eneo maarufu linalouzwa ‘ice Cream’ la Rocky mountain chocolate ambapo walionekana kufurahia huku wakipiga picha za pamoja.
Baada ya kula ‘ice cream’ hizo walielekea katika duka la vifaa vya kuchezea vya watoto wadogo na kadi ambapo walidaiwa kufanya manunuzi makubwa hali iliyomlazimu mlinzi wao binafsi kuingia ndani ya duka hilo kusaidia kubeba mizigo hiyo.
“Walionekana kuwa na furaha sana ni ngumu kujua kwamba miezi kadhaa nyuma familia ya Jolie ilikuwa kwenye hali mbaya baada ya kugombana na Pitt, sura zao zilijaa tabasamu na muda wote walikuwa wakicheza na kupiga picha,”kilisema chanzo cha habari.